Et gëtt Fréijoer ...
Fir dʼalleréischt wollt ech nach eemol Merci soen, datt Der zu sou dacks um
Kongress waart. Merci och nach eemol der Sektioun Réiserbann an der
Gemeng Réiser, déi duerch eng gutt Organisatioun zum perfekten Oflaf bäigedroen
hunn.
E grousse Merci och den Delegéierten, datt se mech a menger Fonctioun
fir e weidert Mandat bestätegt hunn.
DʼStatutenännerung ass reibungslos iwwert dʼBühn gaang an et war eng
gutt Stëmmung.
Dëse Kongress soll en Neiufank fir ons Ligue Gaart an Heem sinn. Ech sinn
optimistesch, datt mer all zesummen et hi kréien, onse Klenggäertnerverband
net nëmmen dauerhaft ze erhalen, mä en och fit fir dʼZukunft ze
maachen an nei Perspektiven ze proposéieren. Ons nei Memberen am
Comité sinn dofir e Garant.
Mir wäerten ons an de nächste Wochen am Comité zesumme sëtzen, fir ons
funktionell ze organiséieren. Mir halen Iech um Lafenden.
Et ass dann och souwäit, datt mer déi éischt Sessioun vun onsem ugekënnegte
„Verwaltungsléiergang fir dʼGaart an Heem-Sektiounen“ starten, mat
Course Freides den 20.4. vun 19.00 bis 21.00 Auer a Samschdes den 21.4.
vun 8.30 bis 12.00 Auer an onse Raimlechkeeten an der Bouneweger
Strooss. Mir hunn nëmmen 12 Plazen, an dʼAschreiwung ass ab dem 15.4.
iwwer Mail oder per Telefon am Sekretariat. Déi éischt si vir!
Ech wollt och schonn déi Klenggäertner opruffen, déi hire Gaart wëllen
um „15. Dag vun der oppener Gaardepäertchen“ de 24. Juni 2018 weisen,
sech prett ze maachen. Dir kënnt Iech lo scho gäre bei ons am Sekretariat
mellen. Den Umeldeformular fannt Der an dëser Editioun op Säit 77.
De Wanter ass dëst Joer besonnesch zéi, ma iergend eng Kéier ass en
eriwwer, a mir kënnen erëm an onse Gäert untrieden, mir freeën ons drop a
wënschen Iech all eng super Gaardesaison.

 

Dr Martine Mergen 
Presidentin             
 

 
Zum Seitenanfang