Anmelden

Einloggen

Username *
Password *
an mich erinnern

De Fall Terra Preizerdaul a wéi geet et virun?
No der Summervakanz hätt ech léiwer méi e positive Leitartikel geschriwwen wéi deen hei,
ma mir mussen d’Situatioun zur Kenntnis huelen an zesumme kucken, wéi mer reagéieren.
Den 9. August huet d’Sektioun Terra Préizerdaul definitiv d’Handduch geworf a sech op enger
ausseruerdentlecher Generalversammlung opgeléist. Dir wësst, em wat et gaangen ass: Steierfuerderungen
vun 1915 € an eng Avance vun 750 € fir 2019, dat ass einfach net ze packen fir
d’Keess vun enger vun onse Sektiounen. Op déi vill Bréiwer an Entrevuen, souwuel vun der
Sektioun wéi vun der Ligue an de leschte Joeren ass näischt passéiert. D’Steierverwaltung huet en
daaft Ouer gemat a sech op d’Gesetz beruff, e “recours en remise gracieuse” ass ofgeleent ginn.
Et ass richteg, datt d’Steiergesetz dëst virgesäit, ma d’Recht ass hei net gerecht.
Déi Forfaitszommen, déi fälleg sinn, also 530 € pro Joer ofgeronnt, sinn einfach démesuréiert,
wann ee sech am Laf vum Joer e klenge Pécule erschafft huet, dat waren an dësem Fall an der
Moyenne 2660 € pro Joer. Dëst Resultat ass geschafe ginn mat de fläissegen Hänn vun der Presidentin
Viviane van der Pal an hirer Équipe. All Sou ass erëm an nei Projete gestach ginn, déi
hire Memberen an all de Leit an hirer Gemeng zegutt koumen. D’Lokalsektioun hat jo 2016 nei
ugefaang an direkt richteg ugerappt. Si war e Modell fir ons all a mir waren houfreg op hiert
Engagement, hiren Asaz an dat, wat si erschafft huet.
Wat dat fir all déi aner Sektioune bedeit, ass nach net ganz kloer, wëll si bis haut déi eenzeg sinn,
déi sou vun de Steieren harceléiert goufen. Do wou d’Politik Ënnerstëtzung versprach huet, dat
souwuel vu Säit vun der Majoritéit wéi vun der Oppositioun, do héiert een näischt.
Wéi solle mer virgoen? All Sektioun ass theoretesch steierpflichteg egal op asbl oder association
agricole. Wann d’Sektioune sech all, sou wéi d’Gesetz et verlaangt, en règle sëtzen, dat heescht,
wa si sech am RESA androen, brav hir Dateschutzerklärung maachen an hir Déclaratioun beim
“régistre des bénéficiaires effectifs” ofginn, da bleift ofzewaarden, wat da passéiert. Dat gëllt fir
de gesamte Bénévolat.
An dat bréngt mech zu menger nächster Remarque: d’Dateschutz- an Anti-Blanchimentsgesetzer
si sécher net fir de Bénévolat geschriwwe ginn. Hei geet et em ganz aner Enjeuë wéi ons kleng
Keesen. Hei geet et net em déi puer Sou, déi ons Memberen mat hirem Engagement an hirer
Fräizäit erschaffen, an de moere Benefiss, deen si perséinlech dovun hunn, ass vläicht eemol en
Ausfluch oder en Iessen.
Och wann et sécher e puer Sektioune gëtt, déi iwwer méi finanziell Mëttele verfügen, well si zum
Beispill eng “Cité jardinière” verwalten oder soss e Revenu hunn, da soll d’Regierung sech op
d’Been sëtzen, an d’Gesetz esou adaptéieren, datt eng gerecht Besteierung erfollegt, dat heescht
relativ zum Akommes wéi bei alle Steierpflichtegen an net iwwer e Forfait, dee fir vill Veräiner
net ze stëmmen ass.
De Finanzminister hat mer am Juli 2018 op eng parlamentaresch Ufro dozou geäntwert, eng
Ännerung vum Gesetz wier net opportun. Souwäit zur politescher Ënnerstëtzung vum Bénévolat!
Dës Haltung ass lähment fir all déi Leit, déi sech an hirer Fräizäit fir d’Allgemengwuel asëtzen.
Et sief notéiert, datt d’Verwaltung eleng décidéiert, wellech Associatiounen “des buts culturels,
charitables ou d’intérêt général” verfollegen a wellech net. D’Klenggäertnerei schéngt aus dëser
Vue jiddefalls net dozou ze gehéieren!
Loosse mer ons awer net découragéieren! Mir wäerten no der Vakanz nach eemol d’Weeër maachen,
fir ze sondéieren, wéi et soll weider goen. Mir wiere frou, wann d’Sektiounen all op den
Hierschtregionaldelegéiertenversammlunge vertruede wieren, fir iwwer all dëst ze diskutéieren.
D’ Täschebuch gëtt dëst Joer rëm méi dënn, well de Ministère deen
et sollt dëst Joer gestalten, en cours de route ofgesprongen ass,
wann och mat engem schéine Subside... à bon entendeur, salut!
Dr Martine Mergen
Presidentin vun der Ligue CTF
AN ALLE SEKTIONENVORSTÄNDE:
BITTE WICHTIGE MITTEILUNG AUF SEITE 183
IN DIESER AUSGABE ODER AUF UNSERER
INTERNETSEITE www.ctf.lu BEACHTEN!

Martine V2

Dr Martine Mergen
Présidente

         
 
 
Zum Seitenanfang